Act 13 | TVK | STEP | E sias tahal Antiok, provet e tisa ngan xil lateti en: Banabas, Simeon (xa be timaluxoluk tei), Lusias (tahal Saerin), Manaen (xa tehe timue hos tei na Suv Toto Herot), e Sol.

Acts 13

Ninin Eo Bosei Banabas xal Sol ve Polien Tei

1 E sias tahal Antiok, provet e tisa ngan xil lateti en: Banabas, Simeon (xa be timaluxoluk tei), Lusias (tahal Saerin), Manaen (xa tehe timue hos tei na Suv Toto Herot), e Sol. 2 Vatei, melele xa di lamot mi Hi e di labal ni anien, Ninin Eo bemei misepin mi xil bitene, “Muha muling Banabas e Sol ti lalipol ni polien xa inou nabosei xalu tuei ven.” 3 Ma xil langgulehi di labal e di lasis. Di, laling he e Banabas e Sol e lasil rat xalu luba.

Banabas e Sol Lube Saepras

4 Dutou ni xa Ninin Eo misa rat Banabas e Sol ra hal Antiok, xalu luba lube Selusia. Lunggo tuturil e rute ak lube aelan tahal Saepras. 5 Melele xa lube ut e hal Salamis, lube nim te pispisien xil e di lusetu usil sepinien na Hi mi Siu xil. Sion Mak mun be xatel e di dutou ni xalu.

6 Di, Banabas e Sol lunggur xoteh aelan tahal Saepras luba lube taon tahal Pampos. E inggak, lubisu mi Siu tei, hisen Eleimas. ^{▼▼13:6 E sepinien na Siu xil lakesi ni 'Bar-Iesu'.} Xi be moletin tei te vongou e di miluvos moletin xil bit xi be provet tei na Hi. 7 Vehakut, de sangas visal vat tei te kavmen xa di milaxat rute ak, hisen Serkias Polas. Xi be moletin tei xa tehe eimae, e melele xa milonge xa Banabas e Sol ludi inggak, mikes xalu lumei tengan lalsetu ni sepinien na Hi vateong ni. 8 E Eleimas misep sisil hisealu tengan vasak ni vat na kavmen naneket ti e Iesu. 9 Ninin Eo bemei polu e Sol (xa hisen tei mun be Pol), ma miketeh pus Eleimas 10 e misepin nggeih ba mini bitene, “!Xouk obe nat Temat! !Di obae mi sexien xil vus xa bos! !Opolu ni hisit luvosen xil ngasen e vehakut di osak pisi di obiles longeongen hos usil Suv Iesu mei be luvosen tang! 11 Ve sexien ak, Suv isa pangasien imei e xouk. Metom xalu mei ivar e onapus ti mun miehen ihe nousav vuteili.” Vatakes, Eleimas, meten be momah, dit mitavuel. Ma di kapis tengan vakamet moletin tova vatal xat hen vahe suse mini.

12 Melele xa vat na kavmen pusi mak, mesep pupu e mei mineket e Suv Iesu ve pispisien nalu.

Pol xal Banabas Lube Taon tahal Pisitia-Antiok

13 Pol e ngan tesav xil mun laling Pampos, langgo tuturil labe taon tahal Perka xa de provins tahal Pampilia. E rute ak, Sion Mak be reling xil dilomun be Serusalem. 14 Di, langgo Perka laba labe taon tahal Pisitia-Antiok. E Sabat, labe nim te pispisien na Siu xil e ladotan en. 15 Di, moletin tei buli sepinien tei e Rae xil na Mosis e ngan xa Provet xil latetisi. Melele xa buli bus, vat xil te nim te pispisien ak lasil moletin tei ba misis Pol xal Banabas bitene, “Toxoli xalu, xosxa munggur xat neta tova tengan xa mulihiteni vatutou ni moletin xil ak, ma bos xa mei mulhiteni.”

16 Ma Pol mea, misa hen be nesao tengan liti votei e bitene, “Xamim xa mube Siu, e xamim xa mutave Siu ti xa di mumot mi Hi, bos xa muteong ni nou. 17 Hi na Siu xil iaxa tehosei avu nar xil e tesak ni moletin nar xil mei latehe holu tova tang melele xa lateti e Isip, tave ti neta xa latnave hortan ti te rute ak. Di, Hi teleh rerat xil ra rute ak texo xeihen nan. 18 E neta sav xa sexien xil nae misa, xi telaxat kuh xil e uruvuol huram hanutap lu (40). 19 Di, kantri lu e he sav (7) xa mahulong pupu xa lateti e tan xa mahulong tahal Kenan, Hi tehu len xil e tesa tan nae mi avu nar xil tengan mei ihe tan xati nae. 20 Melele xa latemei e Isip ba duxoh melele xa tan tahal Kenan mei de he, huram handred hat e hanutap lu e hexalu mun (450) tetavi.

“Di, Hi tepet rat suv xil te lepisien tengan ti lipol mi xil ba duxoh melele xa tepet rat Samuel tehe provet nae. 21 E melele xa moletin xil latsis Hi tengan vapet rat suv toto tei valaxat xil, ma Hi tehosei Sol, nat Kis xa texo vatimol na Bensamin. E xi telaxat mol-Isrel xil huram hanutap lu (40). 22 Di, dutou ni ngan xa Hi teso rat Sol, xi pet rat Deved sung mei tehe suv toto nae. Hi tehit usil Deved temak, 'Deved, nat Tiese, napusi xa xi be hisit moletin tei xa inou namaal pupu ven. Xi mikila vapol ni holesok xil vus vaxoni ngan xa inou di ieok bei.'

23 “Hi tehit xati xa moletin tei istal ixo vatimol na Suv Toto Deved tengan mei vateh meulien e Siu xil. Moletin ak be Iesu Kristo. 24 E melele xa Iesu tenapol ti mu, Sion tesetu mi mol-Isrel xil vus tengan lihiles ra tesaen xil nae e limae ni mei literir ni xil e oei. 25 Di, sangas ni melele xa Sion tepol vuol ni polien nan, xi tesis pilei moletin xil tehitene, '?Xamim munemi mubit inou nabe visi? ?Mubit inou nabe xi xa Hi tehit xati tehit isa ni imei? E-e, tave nou ti. Xi itutou imei, e inou natapin ti tengan xa mei nihe slev nan e namur rat sandel nan.'

26 “!Toxoli xil te vatimol na Ebraham, del xamim vus xa di mumot mi Hi e mutave Siu ti, muteong kuhi ni nou! Hi tesa sepinien teteh meulien en mi xir. 27 Xi tesa kokot ni mi Siu xil tahal Serusalem tetel vat nae xil texo tisien na provet xil xa di latvuli e Sabat xil ngasen. E xil latele ras sepinien xil ak, e latnale kil ti xa Iesu be Kristo xa miteh meulien e xil. E neta sav xa lale rasi, melele xa latepol ni suse xa Iesu temat texo en, latesak ni sepinien na provet xil ak mei testal tehe reitin. 28 Tave ti neta xa latnakamet ti neta vasa xa Iesu vapol ni tengan ha vamat ven, e latesi petine Paelet tengan vamae ni lava lavasi vamat. 29 E melele xa latepol ni holesok xil ngasen tehusil naha xa Vanuvei na Hi tehit xati, xil latehur rat tiei nan ra eivave, be latelingi tete vangihat tei. 30 !E Hi tetal rat rilomun ni ra maten! 31 Di, melengien holu, Iesu di testal mi ngan xil xa latehe xil latexo Kaleli mei latehe Serusalem. E taxeak, xil sung di lasep usili mi Siu xil. 32 E xamem mamei tengan masep mese ni mi xamim xa naha xa Hi tehit xati mi avu nar xil tetiamu, 33 xi pol ni bemei be reitin tuei mi xir melele xa tepol ni Iesu temea rilomun ra maten. Ngan ak nggoni ngan taxa Sam xa be lu (2) di tehiteni usil Iesu tehit,

'Xouk obe natuxuli,
e xosali, inou nabe tamom.' ^{▼▼13:33 Sam 2:7}

34 “Hi tetal rat Iesu ra maten e tamaen ni ti mun tengan tiei nan volel. Ngan ak nggoni ngan taxa Hi tehit usili tehit,

'Hitxatien eo xa natepol ni mi Deved,
nipol ni mun mi xamim.' ^{▼▼13:34 Aes 55:3}

35 “E Sam sav mun tesep usili tehitene,

'Hi Suv, onamae ni ti tiei na moletin eo nam navolel ti e vul.' ^{▼▼13:35 Sam 16:10}

36 “E Deved xa xiak, melele xa xi tepol vuol ni holesok xil xa Hi teling xati tengan ti ipol ni, di, mat. Xil latelingi pat e von tehinen tetel avu nan xil, e tiei nan teta tevolel. 37 E ngan ak tamak ti mi ngan xa Hi tetal rati ra maten. 38 Toxoli xil, sepinien xa matsa ni mi xamim mak: Iesu mikila ileh rerat tesaen xil namim e isak ni Hi iketeh ihos mun ni xamim. 39 E ngan xil vus xa laling neketen nae en, vexil imase ra tesaen xil xa Rae xil na Mosis misakras valeh rati ra xil. 40 Ma mulaxat kuh xamim tengan xa naha xa provet xil latehit mese ni tuei nastal ti mun mi xamim. Latesepin ni latehitene,

41 '!Muteong, xamim xa munem mele ni naha xa Hi di pol ni!
!Mutemanin en e mumat!
Tave ti neta xosxa moletin sav tei tomak vamei vasep kila mi xamim,
naha xa di napol ni mi xamim xosali be neta tei xa musakras muke reitin en.'” ^{▼▼13:41 Hab 1:5}

42 Melele xa Pol e Banabas lusepin bus, lube reling xil ra nim te pispisien. Di, moletin xil lasis xalu tengan laltilomun lalisep usil holesok nen ti mun e Sabat xa itutou imei. 43 Dutou ni totanen ak, moletin xil holu langgusil xalu laba, ngan xil xa labe Siu e ngan xil xa latave Siu ti e di langgusil xat Rae na Siu xil e lamot mi Hi nae. Lusepin mi xil e lusel xat xil tengan lixulehi liling nenesien nae e eheien hos na Hi.

44 E Sabat sav mun, sangas moletin xil vus te taon tahal Pisitia-Antiok lamei tengan lalong usil sepinien nalu usil Suv Iesu. 45 E melele xa Siu xil lapus vanut moletin xa be mahulong mak, ma lanem misa pupu ni xalu. Misak ni laseputut ni Pol e lasep sisin holesok xil vus xa di misep usili. 46 Ma Pol xal Banabas lusepin nggeih ba ni xil lubitene, “Hi tehit xati tengan sepinien nan vamei kokot mi xamim. E vengan xa di musin ni e iemim tavei muvur meulien sal, ma malhe reling xamim. Xosali maliha sung mi ngan xil xa latave Siu ti. 47 Hi Suv tesa selxatien ak ba mi xamim tehit,

'Napol ni xamim mube miehen mi ngan xil xa latave Siu ti.
Mak, ma muhur sepinien teteh meulien en iha mi moletin xil vus te ut etan.'” ^{▼▼13:47 Aes 42:6; 49:6}

48 Melele xa ngan xil xa latave Siu ti lalonge mak, lamaal pupu e lapet rat sepinien na Hi. Ngan xil vus xa Hi tehosei xil tengan lihur meulien sal, ngan xil ak laling neketen nae e Suv Iesu.

49 Ma sepinien na Suv miloh mikapis ut ngasen e rute nen ak. 50 E rut Siu xil laba lapus rut vat xil del rut atou ngan xil mun xa labe eilep e polien nae xa di lamos e Siu xil, e lasak ni nenemien nae misa ba ni Pol e Banabas. Misak ni, moletin xil lasil rat xalu lube reling taon nae. 51 Ma Pol e Banabas lumea lurang meas ra kaelealu ba xat taon nae tengan vasel kat xil xa pangasien tei mei xat xil. Di, luba lube taon tahal Aekoniam. 52 E moletin xil tahal Pisitia-Antiok xa mei laneket e Iesu, Ninin Eo bemei polu e xil e sien na Hi di e xil.